Dúirt fórsaí míleata na hIaráine gur scaoil siad diúracáin le bunáit mhíleata leis na Stáit Aontaithe san Iordáin agus le háiteanna i dtíortha Arabacha i Murascaill na Peirse tar éis do na Meiriceánaigh ionaid ar chósta theas na hIaráine a bhuamáil aréir.
Dírithe ar haingir scairdeitleán agus ar ionad stiúrtha míleata sa bhunáit a bhí na diúracáin, a dúirt na hIaránaigh.
Thug na húdaráis san Iordáin le fios gur chuir siad roinnt diúracán malairt slí agus nár gortaíodh aon duine nuair a cuireadh na diúracáin go talamh i bhfad ó mharc.
Dúirt na Meiriceánaigh gur bhuamáil siadsan ionaid stiúrtha agus ionaid faire in aice le Caolas Hormuz tar éis do na hIaránaigh iad féin héileacaptar míleata leis na Meiriceánaigh a chur go talamh inné.
Tuairiscítear gur ceithre huaire an chloig a lean an bhuamáil thart ar Chaolas Hormuz.
Scaoil na hIaránaigh diúracáin le Bairéin agus le Cuáit chomh maith ach ní fios fós cén díobháil a rinneadh sna tíortha sin dá mbarr.
Nuacht agus Cúrsaí Reatha RTÉ