Dódh go han-dona buachaill cúig bliana d'aois agus a mháthair i dtimpiste a tharla ag beárbaiciú i gCill Airne i gCo Chiarraí oíche Dé Sathairn seo caite.
Bhí daoine bailithe timpeall na fulachta i ngairdín in eastát tithíochta ar cholbha theas an bhaile nuair a d'imigh an tine ó smacht.
Tuigtear go raibh roinnt daoine tar éis éarthach a chur orthu féin mar chosaint ar fheithidí agus gur dódh iad nuair a splanc lasair ón tine ina leith.
Tugadh seisear chun an ospidéil de bharr na ngortuithe a bhain dóibh, an buachaill óg agus a mháthair ina measc.
Deir na Gardaí go bhfuil fiosrúchán ar bun acu faoin tubaiste a tharla in Eastát Chlochar Loreto i gCill Airne.
Nuacht agus Cúrsaí Reatha RTÉ