Tá an líon cásanna den fhliú i measc an phobail dúbailte le ceithre seachtaine, dar le ceannasaí Fheidhmeannacht na Seirbhíse Sláinte Bernard Gloster.
Dúirt sé go raibh galair riospráide eile ag scaipeadh go tréan freisin, Covid-19 ina measc.
Taifeadadh 1,845 cás de ghalair riospráide an tseachtain seo caite ar chásanna den fhliú beagnach 1,000 acu, arsa Bernard Gloster.
Fágann sin, a dúirt sé, go bhfuil a lán daoine ag teacht chuig rannóga éigeandála na n-ospidéal agus go bhfuil an bhroid oibre atá ar an bhfoireann leighis ag géarú an t-am ar fad.
Thug sé le fios gur tháinig 4,600 duine os cionn 75 bliain d'aois chuig rannóga éigeandála an tseachtain seo caite, daoine a raibh galar riospráide orthu ina measc.
Tá imní ar Bernard Gloster chomh maith, a dúirt sé, go méadóidh an líon cásanna fliú tuilleadh as seo go ceann coicíse.
Má mhéadaíonn, arsa sé, tá beartais curtha i bhfeidhm le dul i ngleic le haon ghéarchéim, lena n-áirítear breis dochtúirí teaghlaigh a bheith ar fáil agus iad a bheith ar fáil níos minice.
Nuacht agus Cúrsaí Reatha RTÉ