Tá baill d'Fheirmeoirí Aontaithe na hÉireann tar éis deireadh a chur leis an agóid a bhí ar bun acu i gceannáras Bhord Bia i mBaile Átha Cliath i ndiaidh don ghníomhaireacht Stáit glacadh le moladh go ndéanfaí athbhreithniú ar chúrsaí rialachais san eagraíocht.
Le mí anuas, bhí cos curtha i bhfeac ag cúigear feirmeoirí i bhforsheomra fáilte an cheannárais agus bhí feirmeoirí eile i mbun agóide lasmuigh.
Baineann an t-aighneas le ról chathaoirleach Bhord Bia Larry Murrin, duine d'úinéirí an chomhlachta táirgí feola Dawn Farms i gCo Chill Dara.
D'éiligh na feirmeoirí go n-éireodh Larry Murrin as mar chathaoirleach nuair a tháinig sé chun solais go raibh Dawn Farms ag iompórtáil mairteola as an mBrasaíl.
Dar leis na feirmeoirí nach bhféadfadh an Muireánach a bheith ag feadaíl agus ag ithe mine, is é sin a bheith ina chathaoirleach ar eagraíocht a chuireann táirgí bia na hÉireann chun cinn ach ag an am céanna ag tabhairt táirgí bia ón iasacht isteach sa tír.
I ráiteas ó Bhord Bia inniu, fógraíodh go n-éireodh Larry Murrin as an gcúram go sealadach a fhad is a bheadh an t-athbhreithniú á dhéanamh ar chúrsaí rialachais sa ghníomhaireacht.
Is é an Roinn Talmhaíochta a dhéanfaidh coimisiúniú ar an athbhreithniú atá le críochnú faoi dheireadh an Aibreáin, a dúradh.
Nuacht agus Cúrsaí Reatha RTÉ