Is é an t-iarAire Rialtais de chuid Fhine Gael agus an t-iarChoimisinéir Eorpach Phil Hogan an té atá ainmnithe ag Rialtas na hÉireann don phost mar ard-stiúrthóir ar Eagraíocht Bhia agus Talmhaíochta na Náisiún Aontaithe.
Ní raibh aon duine as an Eoraip ina ard-stiúrthóir ar an eagraíocht sin le leathchéad bliain.
Níl ann ach ainmniúchán, más ea, agus beidh le feiceáil cé na daoine a mbeidh Phil Hogan san iomaíocht leo.
Ní go dtí samhradh na bliana seo chugainn a thoghfar an té atá le teacht in áit QU Dongyu, taidhleoir proifisiúnta as an tSín, atá ina ard-stiúrthóir ó 2019.
Stiúrann an Eagraíocht Bhia agus Talmhaíochta taighde agus suirbhéanna agus foilsíonn staidreamh i leith talmhaíochta, foraoiseachta agus iascaireachta le dúil córais bhia an domhain a choinneáil slán.
Seal oifige ceithre bliana a bhíonn ag an ard-stiúrthóir ach tá cead an dara seal a chur isteach.
D'éirigh Phil Hogan as a phost mar Choimisinéir Trádála an Aontais Eorpaigh i mí Lúnasa 2020 nuair a tháinig sé chun solais go raibh srianta Covid-19 sáraithe aige in Éirinn.
Nuacht agus Cúrsaí Reatha RTÉ