I bPáirc Pharnell i mBaile Átha Cliath tráthnóna buaileadh Cill Chainnigh arís i gCraobh na bliana seo agus chinntigh bua Uíbh Fhail in aghaidh Chill Dara go bhfágann na cait slán leis an gcomórtas.
Den chéad uair le 30 bliain ní bheidh Cill Chainnigh páirteach sa chraobh iomána lasmuigh dá gcúige.
Samhradh fada a bheidh ann dóibh anois.
Tá Baile Átha Cliath áfach sa gcluiche ceannais de chraobh iomána an chúige.
Imreoidh siadsan iománaithe na Gaillimhe a bhuail Loch Garman inniu as baile.
Faoi cheann coicíse a bheidh an cluiche sin.
Bhí Baile Átha Cliath ró-mhaith inniu do Chill Chainnigh sa dara leath agus chinntigh poc éirice 20 nóiméad ón deiridh nach sárófaí iadsan.
1-24 le 0-21 a chríochnaigh an cluiche sin.
I gCúige Mumhan bhí bua éasca ag Corcaigh ar an Chlár sa chraobh iomána, imreoidh Corcaigh i gcoinne Luimnigh anois sa gcluiche ceannais ansin.
Ainneoin gur chaill na Cláirínigh tá siad fós fanta sa chomórtas craoibhe ach is léir go gcaithfidh 'an banner' feabhsú má tá siad le dul níos faide an Samhradh seo.