Le Séamus Ó Scanláin
Is beag seans a tugadh dóibh ach bhain imreoirí Cabo Verde allas nach beag as foireann na hAirgintíne sa gcluiche seo i gCorn FIFA an domhain i Miami.
Bhí an Airgintín buacach 3-2 tar éis am breise ach a léithid de thaispeántas ó imreoiri Cabo Verde.
Ní raibh an scriopt léite ag fear Bhaile Átha Cliath agus Ruaigairí na Seamróige, Pico Lopes ná a chomhimreoirí don chluiche sacair seo.
Go deimhin féin is é scéal Cabo Verde ó thús an chomórtais seo ceann de scéalta móra na staire ó buaileadh an chéad chic i gCorn FIFA an Domhain beagnach 100 bliain ó shin anois.
An chéad uair riamh ag an oileán beag seo amach ó chósta na hAfraice i gCorn an Domhain, féadfaidh siad dul abhaile anois le bród ina gcroíthe agus é le rá acu nár buaileadh uair amháin féin iad laistigh de 90 nóiméad i gcaitheamh an chomórtais seo.
Agus bhí dóthain le déanamh ag na seaimpíní sna nóiméid dheireanacha den chluiche seo le fanacht chun cinn; Cabo Verde i mbun ionsaithe go tréan agus mí-ádh ceart orthu nár chothromaigh siad cúrsaí don triú huair chun an cluiche a thabhairt chomh fada le ciceanna píonóis.
Murach sábháil den scoth ó Martinez 5 nóiméad ón scor in am breise cá bhfios nach iad Cabo Verde a bheadh i mbabhta 6 fhoireann déag an chomórtais.
Ba é laoch náisiúnta na hAirgintíne,Lionel Messi, fear atá ag imirt sa chomórtas seo den 6ú huair a chuir an Airgintín chun cinn tar éis 29 nóiméad.
Pas ard isteach ón naoscaire eile sin Martinez a smachtaigh Messi go paiteanta lena chiotóg agus i bhfaiteadh na súl bhí an liathróid i gcúl na heangaí aige, an fichiú huair aige a léithid de bheart a dhéanamh ó chuaigh sé chun páirce ina chéad chomórtas ceannais FIFA i 2006.
Glacadh leis nach mbeadh ann ach ceist ama sula méadófaí an bhearna ach níor ghéill muintir Verde puinn.
7 nóiméad isteach sa dara leath thóg sé sábháil mhaith eile ó Martinez le iarracht íseal ó Duarte a choinneáil amach, á chaitheamh féin ar an talamh leis an liathróid a shealbhú ar éigin Dé.
6 nóiméad ní ba dheireanaí chuaigh an slua le báiní nuair a d'éirigh le Duarte an beart a dhéanamh agus an liathróid a shleamhnú isteach ó 6 slat.
Bhí an-chluiche ag Vozinha, cúlbáire Cabo Verde agus choinnigh sé amach iarrachtaí ó Messi sa dara leath, go háirithe saor chic sa 72ú nóiméad.
1-1 ag lán ama, chaithfí dul i muinín am breise.
Beidh díomá ar Cabo Verde nár phioc siad suas Martinez sa bhosca mór 3 nóiméad isteach in am breise, bhí neart ama aigesan é féin a stiúradh agus urchar d'iarracht a scaoileadh isteach i mbarr na heangaí.
Ach níor loic Verde an iarraidh sin ach oiread, agus ná raibh na foirne ar chomhscór arís a bhuíochas de Lopes Cabral tar éis 103 nóiméad i ndiaidh dósan casadh agus lúbadh a chur ar liathróid a scaoil sé isteach ó imeall an bhosca.
Bhí na foirne gob ar ghob an chuid elle den chluiche cés móite den eachtra chinniúnach 9 nóiméad ó dheireadh am breise nuair a d'ardaigh fear na hAirgintíne,Romero é féin agus theangaigh a chloigeann le liathróid a tháinig trasna chuige agus thug cúl an bhua don Airgintín.
Faoiseamh don Airgintín, crá croí do mhuintir Cabo Verde.
Casfaidh an Airgintín anois ar an Éigipt sa gcéad bhabhta eile.