Tharla páirtúru na gréine in Éirinn tráthnóna inniu, díreach mar a tuaradh, agus deis ag an bpobal ar fud na tíre iontas a dhéanamh den fheiniméan nádúrtha neamhchoitianta.
Thosaigh an ghealach ag urú na gréine in Éirinn ag thart ar 6 a chlog tráthnóna agus nocht sí arís í go hiomlán ag thart ar 8 a chlog.
Is idir an dá linn sin –ag 7.10 –a bhí an buaicurú ann agus bordáil ar dhá nóiméad a mhair sé.
Dhorchaigh an spéir agus d'fhionnuaraigh an t-aer ar feadhan chúpla meandar sin, rud a chuir dubh-iontas ar go leor agus fionnaitheacht ar roinnt eile, b'fhéidir.
I mbeagán focal, is é an ní is urú na gréine ann an ghealach a dhul sa bhealach ar thaitneamh na gréine ar an bpláinéad seo – comhtharlú cosmach nach dtarlaíonn ach uair sna naoi n-airde in áiteanna áirithe sna naoi n-airde.
Is le spéaclaí speisialta a bhreathnaigh na mílte ar an radharc suaithinseach.
Comhairlíodh do dhaoine eile gan lán na súl a bhaint as an urú ach breathnú air as deireadh na súl, nó claonamharc a thabhairt air anois is arís.
Páirturú a bhíothas a thabhairt air ach páirt mhór a bhí ann, más ea, ós idir 92% agus 98% den ghrian a bhí clúdaithe ag an ré úr – 92% i mBaile Átha Cliath, 98% i ndeisceart agus in iarthar na tíre.
Nach ar mhuintir thuaisceart na Spáinne a bhí an t-ádh agus léargas acusan ar lánurú!
Is sa Rúis is túisce a chonacthas an t-urú sular théaltaigh sé soir trasna an leathsféir thuaidh.
Is ar an 11 Lúnasa 1999 a bhí an t-úrú gréine deireanach in Éirinn agus is in 2090 a bheas an chéad cheann eile ann.
Nuacht agus Cúrsaí Reatha RTÉ