Bhásaigh óganach seacht mbliana déag d'aois as Éirinn agus é ar saoire sa Ghréig Dé Domhnaigh seo caite.
Tá fiosrúchán ar bun ag na póilíní faoi bhás Alex McKee as Corcaigh ar oileán Kimolos i ndeisceart na Mara Aeigéiche.
Thuairiscigh craoltóir seirbhíse poiblí na Gréige ERT gur bhásaigh an t-ógánach i dtimpiste a tharla i dteach cónaithe ar an oileán.
Tá corp Alex McKee tugtha go Piréas ar an míntír, áit a bhfuil scrúdú iarbháis dlí-eolaíochta á dhéanamh air.
Is as an nGréig ó dhúchas máthair Alex agus bhí sé ar cuairt chuig daoine muinteartha leis nuair a bhásaigh sé.
Bhí Alex le dul isteach i mbliain na hArdteistiméireachta i bPobalcholaiste Thraolaigh Mhic Shuibhne i gCnoc na hAoine i gcathair Chorcaí.
Mí Eanáir seo caite, bronnadh duais Ombudsman na Leanaí ar Alex agus ar bheirt daltaí eile sa scoil sin sa chatagóir sláinte agus folláine i gcomórtas Eolaí Óg na Bliana.
Nuacht agus Cúrsaí Reatha RTÉ