Is é ceannaire Reform UK Nigel Farage a bhuaigh an fothoghchán parlaiminte i dtoghcheantar Clacton in oirtdheisceart Shasana, mar a bhí súil leis.
Fógraíodh an toradh go hoifigiúil go gairid tar éis 6 a chlog ar maidin inniu.
22,239 vóta a fuair Nigel Farage, sin 62.82% den vóta iomlán, i gcomparáid leis an 9,455 vóta a fuair an t-áilteoir Count Binface a tháinig sa dara háit.
San olltoghchán in 2024, is 21,225 vóta a fuair Nigel Farage, sin 46.2% den vóta iomlán.
44.37% den phobal a chaith vóta an uair seo, sin laghdú de 14% ó 2024.
Dúirt Nigel Farage gur chruthaigh toradh an fhothoghcháin go bhfuil tacaíocht ollmhór aige sa phobal.
Thug sé le fios nach mbeadh sé san ionad comhairimh nuair a d'fhógrófaí an toradh mar gur inis na póilíní dó go raibh sé beartaithe ag feachtasóirí beithé a dhéanamh faoi agus é ar an ardán.
Dúirt Reform UK gur chomhairligh na póilíní dó gan dul chuig an ionad comhairimh mar gheall ar bhagairt a bhí déanta air.
Thuairiscigh an Press Association, áfach, nár thug na póilíní comhairle mar é d'aon iarrthóir.
Reáchtáladh an fothoghchán tar éis do Nigel Farage éirí as a shuíochán an mhí seo caite agus a fhógairt go rachadh sé san iomaíocht arís don suíochán céanna.
D'éirigh sé as an suíochán mar agóid in aghaidh fiosrúcháin atá Parlaimint Westmister a dhéanamh faoi shíntiúis áirithe a fuair sé agus mar agóid in aghaidh ceisteanna ó na meáin chumarsáide faoi na síntiúis sin.
Rinne na príomhpháirtithe polaitíochta i Sasana baghcat ar an bhfothogchán de bhrí, a dúirt siad, gur chreid siad nach raibh ann ach cleasaíocht ag Nigel Farage.
Nuacht agus Cúrsaí Reatha RTÉ