Tugadh buachaill sé bliana déag d'aois os comhair cúirte san Ómaigh i gCo Thír Eoghain inniu agus é cúisithe i ndúnmharú fir agus in iarracht a dhéanamh bean chéile agus iníon an fhir a dhúnmharú i nDún Geanainn sa chontae sin trí lá ó shin.
Maraíodh an fear 61 bliain d'aois in ionsaí a rinneadh air i dteach cónaithe i nDún Geanainn ag thart ar 11 a chlog ar maidin Dé Sathairn.
Ionsaíodh bean chéile an fhir agus a iníon ocht mbliana d'aois freisin, agus gortaíodh go han-dona an cailín óg.
Deirtear go bhfuil bail sheasmhach san ospidéal ar an gcailín anois, a bhuíochas sin ar na póilíní a chuir cóireáil leighis gharchabhrach uirthi ar an mball.
Tugadh an mháthair chun an ospidéil chomh maith agus deirtear nach bhfuil a beatha i mbaol.
Sa chúirt óige san Ómaigh inniu, d'iarr aturnae an chúisí measúnú meabhairshláinte a dhéanamh ar a chliant.
Cheadaigh an Breitheamh Conor Heaney an t-iarratas agus chuir sé an déagóir siar faoi choinneáil go dtí an 15 Meán Fómhair, tráth a thabharfar os comhair na cúirte arís é ar nasc físe.
Nuacht agus Cúrsaí Reatha RTÉ